Exo 22 | NdeIBE | STEP | “Uma umuntu angantshontsha inkabi kumbe imvu abeseyibulala kumbe ayithengise, kumele ahlawule ngezinkomo ezinhlanu zokukhwitshiza inkabi, lezimvu ezine zokukhwitshiza imvu.

Exodus 22

Ukuvikelwa kwempahla

1 “Uma umuntu angantshontsha inkabi kumbe imvu abeseyibulala kumbe ayithengise, kumele ahlawule ngezinkomo ezinhlanu zokukhwitshiza inkabi, lezimvu ezine zokukhwitshiza imvu.

2 “Uma isela lingafunyanwa ligqekeza beselitshaywa lisifa, lowo ozivikelayo kalacala lokuchitha igazi, 3 kodwa kungenzeka ilanga selikhwelile uyabe elomlandu wokuchitha igazi. Isela kusamele sibili ukuthi lihlawule, kodwa nxa lingelalutho, kumele lithengiswe ukwenzela ukuthi lokhu kube yinhlawulo yokuntshontsha kwalo.

4 “Uma isifuyo esintshontshiweyo singatholakala siphila ezandleni zalo – kungaba yinkabi kumbe ubabhemi loba imvu – kumele lihlawule okuphindwe kabili.

5 “Uma umuntu angayadlisa izifuyo zakhe ensimini kumbe esivinini abeseziyekela zizihambela besezisiya kudla ensimini yeyinye indoda, kumele ahlawule ngezithelo ezinhle zensimu yakhe loba isivini sakhe.

6 “Uma kuthungelwa umlilo ulumatha emeveni kuze kutshe lezinhlanga zamabele loba amabele angakavunwa loba insimu, othungele umlilo uzahlawula konke.

7 “Uma umuntu anganika umakhelwane wakhe isiliva kumbe impahla ukuba amgcinele izinto lezi besezintshontshwa endlini kamakhelwana, isela lingabanjwa kumele lihlawule okuphindwe kabili. 8 Kodwa nxa isela lingabanjwanga, umnikazi wendlu kumele ame phambi kwabahluli ukuze kubonakale langabe uke wabeka izandla ezimpahleni zalowo omgcinisileyo.

9 “Kuzo zonke izenzakalo eziqondene lokugcina ngaphandle komthetho inkabi, ubabhemi, imvu, isigqoko kumbe yonke impahla elahlekileyo omunye umuntu angathi ngayo, ‘Lokhu ngokwami,’ wonke amacele womabili kumele alethe izindaba zawo phambi kwabehluli. Lowo abahluli abazakuthi ulecala kumele ahlawule okuphindwe kabili kumakhelwana wakhe.

10 “Uma umuntu angasisela umakhelwane wakhe ubabhemi, inkabi, imvu kumbe esinye isifuyo ukuze kugcinakale besekusifa kumbe kulimale kumbe kuthathwe kungelamuntu okhangeleyo, 11 udaba lwabantu laba luzaqedwa ngokufunga phambi kukaJehova ukuthi umakhelwane konanga impahla yomunye umuntu. Umnikazi kumele akwemukele lokhu njalo akulanhlawulo edingakalayo. 12 Kodwa nxa isifuyo santshontshwa sikumasiselwa kumele ahlawule umnikazi. 13 Nxa isifuyo sidatshudatshulwe yinyamazana yeganga saba yiziqa, uzaletha izicucu eziseleyo njengobufakazi njalo akuswelakali ukuthi abhadale.

14 “Uma umuntu angaboleka isifuyo kumakhelwana wakhe, besesilimala kumbe sife ngesikhathi umniniso engekho, kumele ahlawule. 15 Kodwa nxa umnikazi ekhona, lowo owebolekayo akumelanga ahlawule. Nxa isifuyo siqatshiwe imali ebhadalwe ukusiqatsha igoqela inhlawulo yokulahlekelwa.

Imithetho yokuhlalisana

16 “Uma indoda ixhwalisa intombi emsulwa engakathenjiswa ilale layo, kumele ikhuphe amalobolo, leyontombi ibe ngumkayo.

17 “Uma uyise esala kokuphela ukuthi ayendisele, kusamele akhuphe inhlawulo ekhutshelwa amantombazana amsulwa.

18 “Lingavumeli umthakathi ukuthi aphile.

19 “Wonke umuntu olala lenyamazana kumele abulawe.

20 “Loba ngubani onikela kwabanye onkulunkulu ngaphandle kukaJehova kumele abhujiswe.

21 “Lingahlukuluzi owezizweni ngoba lani lalingabezizweni eGibhithe.

22 “Lingaqilibezeli umfelokazi kumbe intandane, 23 ngoba lingakwenza, besebekhala kimi ngizakuzwa ukukhala kwabo; 24 ukuzonda kwami besekudungululwa, ngilibulale ngenkemba; abafazi benu babe ngabafelokazi, abantwana benu babe yizintandane.

25 “Uma lingeboleka imali omunye wabantu bami ohluphekayo phakathi kwenu, akumelanga lenze njengalowo oweboleka abanye imali, lingamhlawulisi inzuzo. 26 Uma ungathatha isivunulo sikamakhelwane wakho usenze isibambiso, kumele usibuyisele ilanga lingakatshoni, 27 ngoba isivunulo yiso sodwa isigqoko embesa ngaso ubunqunu bakhe. Kambe kuyini okunye angalala ekugqokile? Uma angakhalaza kimi ngizamuzwa ngoba ngilozwelo.

28 “Lingahlambazi uNkulunkulu kumbe lithuke umbusi wabantu benu.

29 “Lingagodli iminikelo eziphaleni zenu loba ezimbizeni zewayini lenu. “Kumele lilethe kimi amadodana enu angamazibulo. 30 Yenzani njalo ngezinkomo lezimvu zenu. Yekelani zihlale labonina okwezinsuku eziyisikhombisa kodwa linginike zona ngosuku lwesitshiyangalombili.

31 “Lizakuba ngabantu bami abangcwele, yikho-ke lingaze ladla inyama yenyamazana eyabe idatshudatshulwe yizilo zeganga. Iphoseleni izinyoni.